Huawei lançon smartfonat 5G – Kompania merr porositë, shitja fillon zyrtarisht më 16 gusht
Kompania kineze, Huawei, lançoi telefonin e parë 5G për përdorim komercial në qytetin e Shenzhenit, ku gjenden edhe zyrat qendrore të kompanisë. Gjiganti kinez i telekomunikacionit po përpiqet të jetë lider në botën e teknologjisë së shpejtë 5G, pavarësisht sanksioneve të vendosura nga Shtetet e Bashkuara të Amerikës. Smartfoni Huawei Mate 20X (5G), fitoi licencën e parë të aksesit në rrjetin 5G në Kinë.
Kompania filloi marrjen e porosive të premten pasdite, ndërsa çmimi është 6,199 yuan ose rreth 898 dollarë amerikanë. Telefoni do të dalë në treg në datën 16 gusht. Ministria e Industrisë dhe Teknologjisë së Informacionit në Kinë në muajin qershor dha licencat për katër operatorët më të mëdhenj të telekomunikacionit, duke shënuar lançimin e komercial të teknologjisë në Kinë. Deri më tani, tetë modele të smartfonëve kanë marrë certifikimin e teknologjisë 5G. Paralelisht me ndërtimin e rrjetit 5G, Kina pritet të përballet me një “boom” të zëvendësimit të smartfonave nga konsumatorët. Gjithashtu, Kina pritet të bëhet tregu më i madh i gjeneratës së pestë, me 460 milionë përdorues deri në vitin 2025.
Aktualisht, më shumë se dy milionë përdorues në pesë zona pilot kanë aktivizuar shërbimet 5G në smartfonat e tyre, pa ndryshuar numrat e telefonit, ndërsa shërbimi parashikohet të jetë i disponueshëm në mbarë vendin deri në muajin nëntor. Më shumë se dhjetë modele smartfonash janë aktualisht me teknologjinë 5G në Kinë, duke përfshirë markat kryesore si Huawei, Samsung dhe Xiaomi.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.