Huawei raporton për 2016 – Fitimi rritet fare pak, shpenzon ndjeshëm në R&D

Gjiganti kinez i smartphonave, Huawei, ka publikuar një fitim neto prej 5.3 miliardë dollarë në 2016-ën, në rritje me 0.4%, ndërsa të ardhurat totale u rritën me 32% në 75.1 miliardë dollarë.

Kompania ka raportuar një rritje të ngadaltë të fitimit edhe pse shitjet ishin në linjë me projeksionet e analistëve. Huawei është prodhuesi i tretë më i madh në botë i smartphonave. Megjithatë, fitimi dhe shitjet nuk po rriten më me ritmin e mëparshëm dhe analistët thonë se shpenzimet në Kërkim dhe Zhvillim (R&D) si dhe në marketing, po fillojnë të tkurrin marzhet.

Ekzekutivët e mbrojnë pozicionin financiar të Huawei, duke thënë se marzhet në 7% janë të përshtatshme.  Kompania me bazë në Shenzhen mbetet ambicioze dhe ka vazhduar të shpenzojë në mënyrë masive në Kërkim dhe Zhvillim, duke investuar 11 miliardë dollarë për të zgjeruar biznesin. Ndërsa shpërblimi i kësaj do të vijë pas disa vitesh, kreu i financave i kompanisë theksoi angazhimin e Huawei në inovacion.

Huawei ka përfituar nga problemet e Note 7 të Samsung, por me prezantimin e Galaxy S8, konkurrenca do të jetë e vështirë. Analistët thonë se investimet e Huawei në Kërkim dhe Zhvillim, kryesisht në zhvillimin e rrjeteve 5G, bëjnë që kompania të mund të vendosë standarde në industrinë e tërë, një lëvizje që do të reflektohet edhe te pasqyrat financiare.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.