Humbjet e Credit Suisse arrijnë në 2.34 mld USD 3-mujorin e fundit të 2016
Banka zvicerane “Credit Suisse” publikoi një humbje për tremujorin e katërt në 2.34 miliardë dollarë, kryesisht prej akuzave të Departamentit të Drejtësisë në SHBA në biznesin e letrave me vlerë të kolateralizuara në krizën e 2008-ës. Institucioni premtoi të shkurtojë 5,500 vende pune këtë vit.
Kjo humbje është më e madhe se 2.06 miliardë dollarë që projektonin analistët e Bloomberg. Banka ka shtuar 2.17 miliardë dollarë provigjone, kryesisht prej marrëveshjes prej 5.3 miliardë dollarë me Departamentin e Drejtësisë në SHBA.
“Marrëveshja ishte një ndryshues loje. Kjo na lë në një pozicion më të mirë për bërë planifikimet për kapitalin”, tha kreu ekzekutiv i bankës Tidjane Thiam.
Kreu i institucionit tha se përmirësimi i humorit të tregut për bankat që ka nxitur tregtinë në tremujorin e katërt, ka vazhduar edhe në këtë vit. Banka po punon ende për një ofertë publike fillestare të njësisë në Zvicër për gjysmën e dytë të këtij viti, që të rrisë kapitalin.
Akuzat nga SHBA kanë lënë gjurmë edhe në kapitalin rregullator. Credit Suisse raportoi një raport të kapitalit bazë kundër aktiveve të ponderuara me risk (Tier 1 ratio), prej 11.6% në fund të muajit Dhjetor, në rënie nga 12% që ishte në fund të Shtator. Banka synon një normë të mjaftueshmërisë së kapitalit në 13% deri në fund të 2018-ës.
Credit Suisse propozoi një dividend të pandryshuar prej 0.7 franga për aksion. Si të gjithë huadhënësit e tjerë të mëdhenj në Europë, Credit Suisse po ndjen presionet e normave të interesit dhe rregullave që kërkojnë më shumë rezerva për bankat.
Klevis Llaha/ RTVSCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.