Humbjet e energjisë në rrjet – Nis rishikimi i planit të reduktimit, OSHEE: Objektivi të bëhet 24%

Objektivat për reduktimin e humbjeve të energjisë në rrjetin e shpërndarjes do të rishikohen, ndërkohë që tashmë ka nisur puna për ndryshimin e Vendimit të Këshillit të Ministrave në këtë drejtim.

Kjo masë vjen pas mosarritjes të objektivit prej 21 % të vendosur nga Banka Botërore, ndërkohë që zyrtarë të Operatorit të Shpërndarjes së Energjisë Elektrike, thanë se synimi është që objektivi të rritet në 24%.

Për vitin 2017 niveli i humbjeve të energjisë elektrike në rrjet u regjistrua në 26.41% duke shënuar përmirësim në krahasim me një vit më parë.

Por, pavarësisht se ai pësoi ulje, ishte larg objektivit prej 21% të vendosur nga Banka Botërore, e cila adresoi edhe kritika ndaj qeverinë për ngadalësimin e reformës në sektorin energjetik.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.