Humbjet në rrjet/6-mujori, OSHEE i raporton në 25.4%
Operatori i Shpërndarjes së Energjisë Elektrike publikoi të hënën disa tregues të performancës së kompanisë për gjashtëmujorin e parë të vitit. Sipas OSHEE, treguesi i humbjeve në rrjet për gjysmën e parë të këtij viti ishte 25.4%, në rënie nga niveli 28.6% i regjistruar në të njëjtën periudhë të një vit më parë.
Megjithatë, po të krahasojmë treguesit e raportuar nga OSHEE me bilancin e energjisë elektrike, të publikuar nga Instat, kjo tendencë në përmirësim nuk ka ardhur gjatë gjysmës së parë të këtij viti, por kryesisht gjatë gjysmës së dytë të vitit 2017.
Për të gjithë vitin e kaluar, Instat raportonte se niveli i humbjeve në rrjet kishte qenë 25.2%. Rrjedhimisht, humbjet prej 25.4% të raportuara nga OSHEE për 6-mujorin e parë të vitit tregojnë një përkeqësim të lehtë krahasuar me të gjithë vitin 2017.
Gjithsesi, OSHEE bën të ditur se për muajin e fundit, qershor 2018, niveli i humbjeve në rrjet ka zbritur në 20.8%.
Mbështetur në njoftimin zyrtar të OSHEE, vlera totale e arkëtimeve për 6-mujorin e parë arriti në 33.4 miliardë lekë, në rritje me afro 5% krahasuar me të njëjtën periudhë të një viti më parë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.