Hungaria merr karburant bërthamor nga Rusia në rrugë ajrore dhe do ta paguaj atë në rubla!

Hungaria mori nga Rusia të mërkurën dërgesën e parë të karburantit bërthamor për centralin e saj bërthamor Paks, pasi lufta në Ukrainë e bëri të pamundur transportin me hekurudhë, tha të enjten ministri i Jashtëm Peter Szijjarto. Szijjarto përsëriti se Hungaria hodhi poshtë çdo sanksion ndaj naftës dhe gazit rus, duke shtuar se vendosja e çdo sanksioni për aktivitetet që lidhen me energjinë bërthamore ishte gjithashtu një “vijë e kuqe” për Hungarinë.

Ai tha se dërgesa e karburantit kishte mbërritur përmes hapësirës ajrore të Bjellorusisë, Polonisë dhe Sllovakisë në Hungari me miratimin e të tre vendeve, pasi energjia bërthamore nuk i nënshtrohet asnjë sanksioni të Bashkimit Europian. Hungaria dëshiron të zgjerojë termocentralin e saj bërthamor 2 gigavat, Paks, të ndërtuar nga Rusia me dy reaktorë VVER të prodhimit rus, secili me një kapacitet prej 1.2 gigavat.

Projekti, i dhënë në vitin 2014 pa tender gjigantit bërthamor Rosatom, është cituar shpesh si një shenjë e lidhjeve të ngrohta midis kryeministrit hungarez Viktor Orban dhe presidentit rus Vladimir Putin. Projekti ka pësuar vonesa. Orban, i cili u rizgjodh për një mandat të katërt radhazi në zgjedhjet të dielën, tha në një konferencë shtypi të mërkurën se Budapesti dëshiron të forcojë aleancat e tij perëndimore, pasi e ardhmja e Hungarisë ishte në BE dhe fort brenda NATO-s.

Por ai tha gjithashtu se Hungaria ishte e përgatitur të paguante rubla për gazin rus, duke thyer radhët me BE-në, e cila ka kërkuar një front të bashkuar për të kundërshtuar kërkesën e Moskës për pagesë në monedhën vendase. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.