Hungaria nuk do të mbyllë shkollat, Orban: “Valën e dytë do ta luftojmë ndryshe. Nuk do mbyllemi më!”
Hungaria nuk do të mbyllë shkollat për të ndaluar përhapjen e koronavirusit, por do të përqëndrohet tek mbrojtja e të moshuarve, ndërkohë që objektivi është rimëkëmbja e ekonomisë, sipas Kryeministrit Viktor Orban. Ai tha se veshja e maskave në transportin publik do të jetë e detyruar dhe, nëse do të jetë e nevojshme, do të aplikohet më gjerësisht. Megjithatë, kryeministri shtoi se vala e dytë e pandemisë kërkon një strategji të ndryshme nga e para, që goditi rëndë ekonominë në Mars dhe Prill.
“Objektivi i tanishëm nuk është që të qëndrojnë të gjithë në shtëpi dhe vendi të arrijë në një ndalesë. Objektivi është që vendi të vazhdojë të operojë. Nuk mund ta përballojmë dot që virusi të na gjunjëzojë përsëri.”
Orban shtoi se katërshja e Bashkimit Europian; Hungaria, Sllovakia, Republika Çeke dhe Polonia, do të koordinojnë masat për të luftuar pandeminë. Ndërkohë, numri i rasteve të reja në vend është shtuar ndjeshëm gjatë Shtatorit. Hungaria ka mbyllur kufijtë ndaj turistëve të huaj që nga data 1 Shtator, për të parandaluar infeksionin. Paralelisht, Hungaria vendosi të përjashtojë turistët nga 4 vendet europiane të lartëpërmendura, ç’ka solli kritika nga Komisioni Europian. Vendi regjistroi 476 raste të reja në 24 orët e fundit, duke e çuar totalin në rreth 10,200.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.