Hyn në fuqi vendimi për dietat e ushqimit, 1-3 vakte falas në ditë për policët dhe të arrestuarit!
Punonjësit e strukturave të Policisë së Shtetit tashmë kanë të drejtën e përfitimit të ushqimit falas gjatë orarit të punës. Vendimi është botuar në Fletoren Zyrtare e parashikon dhënien e 1-3 vakteve për punonjësit e policisë por edhe për të arrestuarit, raporton SCAN. Referuar vendimit, trajtohen me ushqim, pa pagesë, strukturat e Policisë së Shtetit, si më poshtë
a) Punonjësit e strukturave të veçanta të Policisë së Shtetit, ato të Forcave Speciale e të Ndërhyrjes së Shpejtë, si dhe struktura të tjera që me akte normative njehsohen me to:
– me një vakt “drekë”, për ditët kur kohëzgjatja e punës është 8 (tetë) orë;
-me tri vakte për ditët kur punonjësit janë të angazhuar në veprime operacionale apo gatishmëri, kur kohëzgjatja e punës është më shumë se koha normale e punës prej 8 (tetë) orësh;
-me tri vakte për ditët kur punonjësit e policisë janë të angazhuar në gatishmëri, në shërbime për ruajtjen, sigurimin dhe mbarëvajtjen e procesit zgjedhor, për përballimin e situatave emergjente dhe të fatkeqësive natyrore, të shkaktuara nga faktorë natyrorë, teknologjikë, industrialë, socialë ose veprime të shkaktuara nga njerëzit, kur kohëzgjatja e punës është mbi kohën normale të punës prej 8 (tetë) orësh.
Po ashtu, nga vendimi për trajtim me ushqim falas përfitojnë edhe të gjithë studentët, kursantët dhe instruktorët në institucionet arsimore dhe në institucionet e Policisë së Shtetit brenda vendit:
-me një vakt “drekë”, kur kohëzgjatja e trajnimit është 1 (një) ditë pune, 8 (tetë) orë;
-me tri vakte, kur kohëzgjatja e trajnimit është më shumë se një ditë pune. Për ditën e parë të trajnimit, trajtimi me ushqim do të bëhet për vaktet “drekë” e “darkë” dhe për ditën e fundit të trajnimit, trajtimi do të bëhet për vaktet “mëngjes” e “drekë”.
Ndërkohë, vendimi përcakton trajtimin me tri vakte ushqim, pa pagesë, edhe për kategoritë e mëposhtme:
-shtetasit e huaj që hyjnë ilegalisht në territorin e Republikës së Shqipërisë, deri në sqarimin e pozitës së tyre;
-shtetasit shqiptarë të kthyer nga vendet e tjera, deri në sqarimin e pozitës së tyre;
-shtetasit e ndaluar ose të arrestuar, deri në sqarimin e pozitës së tyre ose deri në transferimin e tyre në institucionet e ekzekutimit të vendimeve penale (IEVP).
Vendimi përcakton gjithashtu se shërbimi i ushqimit bëhet i gatuar në mensa, si dhe me shërbim shpërndarjeje (catering), i cili i nënshtrohet të gjitha procedurave të prokurimit, sipas legjislacionit në fuqi.
Për rastet kur kategoritë përfituese, për shkak të detyrës janë larg qendrës së punës e të shërbimit dhe kur shërbimi i shpërndarjes (catering) nuk mund të realizojë furnizimin me ushqim në atë terren, bëhet kompensimi në vlerë (në lekë), për ditët efektive të punës. Vlera e kompensimit (në lekë) të ushqimit bëhet bazuar në normën e përcaktuar ushqimore dhe miratohet nga Drejtori i Policisë së Shtetit. Fondi i përcaktuar për këtë qëllim planifikohet për çdo vit në programin buxhetor të Policisë së Shtetit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.