“Hyni në tregun e kapitaleve” – AMF, apel biznesit në hapje të javës së investitorit
Në vitin 2019, sipërmarrja shqiptare ende nuk i ka eksploruar mundësitë dhe përfitimet që mund të japë tregu i kapitalit. Drejtori Ekzekutiv i Autoritetit të Mbikëqyrjes Financiare, Ervin Koçi, tha të hënën gjatë një takimi me përfaqësues të Dhomës dhe Tregtisë dhe Industrisë Tiranë, se biznesi të përdorë instrumentet e bursës, si për të siguruar financime, ashtu edhe për të investuar fondet e veta dhe për të diversifikuar strukturën e aseteve financiare. Mesazhi i AMF-së vjen në hapjen e javës globale të investitorëve, një nismë të cilës këtë vit i është bashkuar edhe Shqipëria.
Kryetari i Dhomës së Tregtisë dhe Industrisë Tiranë, Nikolin Jaka, tha se instrumentet e tregut të kapitalit janë sot domosdoshmëri, në mënyrë që biznesi shqiptar të jetë mjaftueshëm konkurrues në epokën e globalizmit.
Që nga viti i kaluar, Shqipëria ka më në fund një bursë funksionale titujsh, që deri tani është angazhuar në tregtimin e instrumenteve të borxhit qeveritar. Së shpejti, bursa ALSE do të hapet edhe për tregtimin e titujve të kompanive private. Kjo pritet të hapë horizonte të reja për bizneset që duan të sigurojnë kapitale, si edhe për investitorët që kërkojnë alternativa të reja të investimit financiar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.