I ftohti siberian edhe në Shqipëri – Rreth 90% e territorit është mbuluar nga dëbora
Në orët e para të mëngjesit të së martës kryeqyteti është mbuluar nga petku i dëborës. Reshjet e dëborës kanë nisur prej dy ditësh dhe do të vazhdojnë edhe ditën e mërkurë.
Sipas Institutit të Gjeoshkencës më 28 shkurt në shumicën e qarqeve priten reshje të dobëta, ndërsa në Dibër, Tiranë dhe Elbasan reshje mesatare. Reshjet në formë dëbore do të jenë prezente kryesisht në zonat malore, por edhe në ultësirat fushore deri në afërsi të bregdetit.
Sipas IGJEUM reshjet e dëborës mund të sjellin problematika të ndryshme në transportin rrugor dhe ngrica si pasojë e uljes së ndjeshme të temperaturave, sidomos gjatë natës. Nga llogaritjet hidrologjike e IGJEUM, rezulton se lumenjtë në të gjithë territorin do të kenë prurje të qëndrueshme përgjatë dy ditëve të ardhshme.
Por nga data 2 Mars 2018 dhe ditët në vazhdim tendenca e prurjeve do të jetë drejt rritjes. I ftohti siberian ka përfshirë Ballkanin dhe gjithë Evropën. Reshjet e dendura të borës kanë anuluar shumë udhëtime dhe kanë krijuar vonesa në aeroporte si dhe kanë shkaktuar vështirësi në qarkullimin rrugor e hekurudhor, ndërsa shumë shkolla janë mbyllur.
Edhe në Evropë, situata paraqitet tejet serioze. Rreth 400 fluturime janë anuluar vetëm në Schiphol të Holandës, në një nga aeroportet më të mëdha në Evropë dhe rreth 200 të tjera janë anuluar në Bruksel.
Ndërkohë që edhe Gjermania është mbuluar nga bora. Ndërsa Britania e Madhe po përballet me javën më të ftohtë në 5 vjet. Duke ju rikthyer situatës në vend temperaturat për ditën e mërkurë 28 shkurt do të jenë:
TEMPERATURAT
(E mërkurë, dt.28) temperaturat minimale dhe maksimale të ajrit pritet të arrijnë:
në bregdet: +1 / 7
në vendet e ulëta: +1 / 5
në vendet malore: – 8 / 2 °C
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.