IAEA: Irani kërkon mbikëqyrje! Niveli i pasurimit të uraniumit i ngjashëm me vendet që bëjnë bomba
Shefi i Agjencisë Ndërkombëtare të Energjisë Bërthamore, ka shprehur alarm mbi programin bërthamor të Iranit, në një intervistë me të përditshmen Financial Times. Rafael Grossi, drejtori i përgjithshëm i agjencisë, tha se situata është shumë shqetësuese. Më herët gjatë Javës, Irani dhe mbikëqyrësi bërthamor i Kombeve të Bashkuara, ranë dakord të zgjasin marrëveshjen e monitorimit me 1 muaj. Paralajmërimi erdhi në një kohë të tensioneve të larta mes Iranit dhe fuqive botërore që nënshkruan marrëveshjen bërthamore të vitit 2015, ndërkohë që po zhvillohen negociatat për ta ringjallur paktin. “Një vend që arrin nivel të pasurimit të uraniumit në 60% përbën diçka serioze. Vetëm vendet që prodhojnë bomba e arrijnë atë nivel. Pasurimi tregtar është vetëm 2-3%”- tha Grossi për të përditshmen. Ai shtoi se ky nivel kërkon vigjilencë, pavarësisht se është e “drejta sovrane” e Iranit për ta zhvilluar programin, gjë të cilën Teherani këmbëngul se është vetëm për qëllime të energjisë. Irani ka rritur stokun e uraniumit dhe pasurimin gradual që thyen marrëveshjen e vitit 2015, që heq sanksionet ekonomike të vendit në këmbim të frenimit të këtij programi. Rritja e aktivitetit nisi në Maj 2019, 1 vit pasi ish- presidenti i SHBA, Donald Trump, tërhoqi Amerikën nga marrëveshja shumëpalëshe me Iranin.
Vendi po pasuron tashmë uraniumin në 60% pastërti, që është nivel shumë më i lartë se 3.67% që lejohej tek marrëveshja. Niveli i pasurimit për të prodhuar një bombë është 90% dhe Teherani vazhdon të argumentojë se kjo ka qëllime “paqësore”.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.