Ifo paralajmëron për krizë – Instituti bën thirrje për përfundimin e politikave lehtësuese të BQE

Kreu i institutit gjerman për ekonominë Ifo, paralajmëroi për një rikthim të krizës së eurozonës dhe tha se Banka Qendrore Europiane duhet të nisë përfundimin e politikave monetare me norma të  interesit nën zero.

Kreu i institutit, Clemens Fuest tha se rimëkëmbja e dukshme në ekonominë e Eurozonës si dhe rritja e normës së inflacionit, çmimeve të obligacioneve, aksioneve dhe pronave të patundshme, janë ndër arsyet për Bankën Qendrore Europiane për të ndryshuar kursin.

“Sa më gjatë të vazhdojë kjo, më e vështirë do të jetë kur periudha e parasë së lirë të përfundojë. Ka ardhur koha për të nisur procesin e daljes”, tha kreu i Ifo.

Banka Qendrore Europiane mbajti të pandryshuar qëndrimin mbi politikat lehtësuese monetare në përfundimin e takimit të muajit Shtator dhe bëri të ditur se mund të rrisë blerjet mujore të aktiveve nëse do të jetë e nevojshme, pavarësisht performancës më të fortë ekonomike që prej krizës financiare globale.

Ai tha se është dakord në parim se politikat e BQE kanë qenë të nevojshme duke marrë parasysh nivelin e ulët të inflacionit dhe dobësisë ekonomike në eurozonë, por situata ka ndryshuar.

Shumë vende në Eurozonë bartin nivele më të larta të borxhit tani, krahasuar me periudhën përpara krizës dhe bankat në disa vende nuk janë ende në performancën që duhet.

Për më tepër, bankat mund të blejnë ende tituj sovranë të borxhit pa garanci në tituj kapitali. “Këto janë ndër arsyet që kriza pritet të kthehet”, tha ai.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.