Ikin ministrat teknikë – Më 17 gusht të gjithë japin dorëheqjen zyrtare
Të gjithë ministrat teknikë, të zgjedhur nga Partia Demokratike pritet që të japin dorëheqjen më 17 Gusht të 2017. Këtë lajm e konfirmojnë për televizionin SCAN burime nga selia blu. Kështu, tre muaj nga marrëveshja Rama – Basha, ministrat teknikë pritet që të largohen nga qeverisja e vendit dhe në këtë mënyrë hedhin poshtë çdo tezë për një bashkëqeverisje mes PS-PD.
Ministrat teknikë ishin pjesë e marrëveshjes për të garantuar zgjedhje të lira dhe të ndershme, por ministrat teknikë qëndruan edhe dy muaj të tjerë pas zgjedhjeve, për të hartuar raportin për standardin e zgjedhjeve.
Në tre muaj që ishin në qeverisje, ministrat teknikë nuk janë takuar asnjëherë me kryeministrin Rama, ndërkohë që ka qenë Sekretari i Përgjithshëm i Kryeministrisë, me të cilin kryhej komunikimi për funksionimin e tyre.
Përpara se të jepnin dorëheqjen, disa prej ministrave teknikë i kishin kaluar më parë kompetencat te zëvendësministrat përkatës: Ministri i Brendshëm, i Shëndetësisë dhe Ministrja e Financave.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.