Ikin zyrtarisht “teknikët” – Dorëzojnë në Kryeministri raportin final dhe dorëheqjet
Largohen zyrtarisht ministrat teknikë të emëruar nga Partia Demokratike. Në mesditën e 17 gushtit dorëheqjet dhe raporti i përgatitur për zgjedhjet e 25 qershorit, janë dorëzuar në Kryeministri.
Kështu u larguan gjashtë ministrat teknikë dhe zv/kryeministrja teknike nga postet që morën pas marrëveshjes së 18 majit mes Ramës dhe Bashës. Pranë Kryeministrisë kanë dorëzuar dorëheqjet: Zv/kryeministrja, Ledina Mandia, ministri i Punëve të Brendshme, Dritan Demiraj, ministri i Shëndetësisë, Arben Beqiri, ministrja e Mirëqenies Sociale, Xhulieta Kërtusha, ministrja e Financave, Helga Vukaj, ministrja e Arsimit, Mirela Karabina dhe ministri i Drejtësisë, Gazment Bardhi.
Së bashku me dorëheqjet, zv/kryeministrja Mandia dorëzoi dhe raportin final me gjetjet për shkeljet e konstatuara gjatë fushatës dhe ditën e votimit të zgjedhjeve të 25 qershorit 2017.
Raport ky që është përcaktuar nga maxhoranca jo i ligjshëm pasi nuk ka kaluar në mbledhjen e Task-Forcës. Sa i përket kompetencave të ministrave teknikë, ato do t’i kalojnë zëvendësministrave, deri në formimin e qeverisë së re.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.