Ilaçet për kancerin e gjirit – Rama: MSH negociata me kompanitë mëmë për uljen e çmimit
Ministria e Shëndetësisë po nis një fazë të re negocimi me kompanitë mëmë për uljen e çmimit të medikamenteve specifike për të gjitha gratë që vuajnë nga kanceri i gjirit. Lajmin e ka bërë të ditur kryeministri Edi Rama gjatë mbledhjes së qeverisë në qytetin e Elbasanit disa ditë më parë.
“Besoj se ju kujtohet historia e mësueses nga Mirdita. Ju kujtohet që zgjidhëm përkohësisht problemin e saj dhe të grave, të cilat kishim ndërprerë terapinë. Sot jam shumë krenar të them se i kemi shkuar deri në fund dhe me një vendim qeverie kemi arritur të hyjmë në një fazë të re përsa i përket trajtimit me këto medikamente specifike, që kanë kosto shumë të larta, duke hapur një kanal të drejtpërdrejtë negocimi mes Ministrisë së Shëndetësisë dhe kompanive të mëdha mëmë.”
Duke shtuar më tej se buxheti i shtetit e ka të pamundur përballimin e kostos së kurës për të gjitha gratë që e kanë të domosdoshme atë, Rama tha se është bërë edhe një provë lidhur me këtë çështje. Kjo e fundit, sipas tij ka rezultuar me sukses, duke dhënë një sinjal pozitiv për uljen e çmimit të këtyre medikamenteve.
“Është bërë një provë, e cila ka dalë me sukses dhe duke iu drejtuar kompanisë mëmë me të gjithë argumentet për pamundësinë e buxhetit të shtetit tonë për të përballuar të gjithë koston e kurës për të gjitha gratë që kanë nevojë të kenë kurë të pandërprerë për kancerin e gjirit, kemi marrë mbrapsht një sinjal tejet pozitiv për një ulje të rëndësishme të çmimit, që e bën të mundur marrjen e këtij medikamenti dhe mbylljen njëherë e mirë, pas një çerekshekulli të këtij problemi kaq jetik dhe kaq thelbësor për gra, për vajza dhe për familje shqiptare,” u shpreh Rama.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.