ILDKPI, bum gjobash në 2017 – 200 urdhra ekzekutimi në gjykatë për deklaratat e pasurisë
Ka shkuar më shumë se 200 numri i zyrtarëve të administratës publike të gjobitur gjatë këtij viti nga ILDKPI. SCAN ka zbardhur më shumë se 200 kërkesa të Inspektoriatit të Deklarimit të Pasurive pranë Gjykatës Administrative për ekzekutimin e gjobave ndaj punonjësve.
Përmes tyre, Inspektoriati procedon me bllokimin e llogarive bankare, zyrtarëve apo ish zyrtarëve të administratës shtetërore ndaj të cilëve është vendosur penalizimi me gjobë. Në rast se gjobat nuk paguhen brenda afatit, Inspektoriati autorizon shoqëritë përmbarimore të bllokojnë llogaritë bankare të zyrtarëve.
Shkak i vendosjes së gjobave janë shkeljet e procedurave të deklarimit, ashtu si dhe vërtetësia e deklaratave personale të pasurisë nga ana e nëpunësve. Pjesa më e madhe e gjobave luhaten në kuotën e 200 mijë deri 600 mijë lekëve.
Sipas të dhënave zyrtare të ILDKPI, gjatë vitit 2016, janë kallëzuar penalisht për fshehje pasurie dhe konflikt interesi 72 zyrtarë, ndërsa 314 të tjerë janë gjobitur për shkelje të ligjit të deklarimit të pasurisë.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.