Impakti i të larguarve në ekonomi – BERZH: Do tkurrin me 11% forcën e punës, norma më e lartë në Europë

Një ndër problemet më të mëdha me të cilat do të përballet ekonomia dhe shoqëria shqiptare në vitet në vijim do të jetë tkurrja e forcës punëtore. Raporti i tranzicionit i BERZH 2018-2019 jep alarmin, pasi thotë se, deri në vitin 2040 Shqipëria do të humbasë 16% të popullsisë në moshë pune. Kjo normë është nën mesataren e rajonit të Europës juglindore, që fiksohet në 17%, por alarmi qëndron tjetërkund. Më shumë se gjysma e kësaj tkurrje do të `ushqehet` nga migrimi neto, pra të larguarit.

Në terma më të thjeshtuar, forca e punës së ekonomisë shqiptare do të tkurret me rreth 11% deri në vitin 2040 si pasojë e atyre që braktisin vendin. Kjo është padiskutim norma më e lartë në rajon dhe e treta më e lartë mes vendeve që mbulon BERZH, pas Jordanisë dhe Republikës së Kirgistanit. Këtë gjë e ilustron shumë mirë grafiku, ku ngjyra bojëqielli e Shqipërisë është bindshëm më e dukshme se në vendet e tjera. Kjo ngjyrë përfaqëson impatkin e të larguarve në forcën e punës. Ky projeksion duket se është rrjedhojë jo vetëm i tendencës së viteve të fundit për t`u larguar nga vendi, sidomos të të rinjve, por edhe e të dhënave që flasin për një dëshirë ende mjaft të lartë për t`u larguar nga vendi.

Këtë e tregon edhe harta nëpërmjet ngjyrës së ndezur, ku rezulton se, në Europë dhe Azinë Qendrore asnjë popull tjetër nuk ka një dëshirë kaq të madhe për t`u larguar.  Një tkurrje e forcës punëtore me 16% përkthehet në dëme të mëdha sa i përket prodhimit të kësaj ekonomie. Pa strategji të posaçme për t`u përballur me fenomenin në fjalë, i cili siç edhe e thotë BERZH, është unik në llojin e tij në Europë për nga përmasat që ka, duket se impakti do të jetë edhe më i madh, edhe pse viti 2040 shumëkujt sot, mund t`i duket i largët.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.