Implantet kokleare falas-Tre fëmijë, pacientët e parë që kanë përfituar nga ndërhyrja
Një mundësi më shumë për personat që nuk dëgjojnë e kryesisht për fëmijët që nuk dëgjojnë. Në Qendrën Spitalore Universitare Nënë Tereza janë bërë për herë të parë ndërhyrjet kirurgjikale për vendosjen e implantit koklear te fëmijët me probleme të thella dëgjimi.
Shef i Shërbimit të ORL-së tek “Nënë Tereza”, profesor Besim Boçi, shprehet se për herë të parë në këtë shërbim është kryer me sukses ndërhyrja për vendosjen e implantit koklear në tre fëmijë.
Implanti koklear, është një pajisje e kompjuterizuar që mund të rivendosë dëgjimin e dobishëm për personat me humbje të rënda ose të thella të dëgjimit , implantohet në fëmijët që kanë shurdhësi të thellë dhe nuk përfitojnë më nga asnjë ndihmesë tjetër dëgjimi. Këto implante janë shumë të kushtueshme dhe jo të gjithë kanë mundësi që të përballojnë kostot e tyre në mënyrë individuale.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.