“Implikim i mundshëm ushtarak” – Gjermania, Franca dhe Britania deklaratë kundër planeve të Iranit për të prodhuar uranium

Fuqitë evropiane kanë shprehur shqetësim të thellë rreth planeve të Iranit për të prodhuar metal uranium, duke paralajmëruar që Teherani “nuk ka përdorim të besueshëm civil” për elementin.

“Prodhimi i metaleve të uraniumit ka implikime të mundshme ushtarake,” thanë ministrat e jashtëm të Britanisë, Francës dhe Gjermanisë në një deklaratë të përbashkët të shtunën.

Irani ka nënshkruar një ndalim 15-vjeçar për “prodhimin ose marrjen e metaleve plutonium ose uranium ” nën Planin e Përbashkët të Përgjithshëm të Veprimit (JCPOA) të nënshkruar në 2015 me fuqitë botërore.

“Ne e nxisim fort Iranin të ndalojë këtë aktivitet dhe t’i kthehet pajtueshmërisë me angazhimet e tij të JCPOA, nëse është serioz në lidhje me ruajtjen e marrëveshjes,” thanë ministrat.

Marrëveshja historike e vitit 2015 e rënë dakord midis Iranit dhe Shteteve të Bashkuara, Kinës, Rusisë, Britanisë, Francës dhe Gjermanisë për të kufizuar programin bërthamor të Teheranit u shkatërrua që kur Donald Trump tërhoqi SHBA në 2018 dhe vendosi përsëri sanksione të ashpra.

Qeveria iraniane ka sinjalizuar gatishmëri për t’u angazhuar me presidentin e zgjedhur amerikan, Joe Biden, i cili merr detyrën në 20 janar dhe i cili ka shprehur gjithashtu gatishmëri për të rikthyer diplomacinë me Teheranin.

Dosti Banushi – SCAN
Burimi: The Guardian

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.