India do rimëkëmbet në vitin e ardhshëm / S&P: Perspektiva pozitive, prej fushatës më të madhe të vaksinimit në botë
Agjencia e vlerësimeve S&P, deklaroi se India pritet të rimëkëmbet nga tkurrja e pandemisë në vitin e ardhshëm, ndërkohë që edhe perspektiva në afat-shkurtër është pozitive, pasi vendi nisi muajin e kaluar programin më të madh në botë të vaksinimit. Ekonomia më e madhe e Azisë së Jugut mund të rritet me 10% në vitin fiskal 2022, sipas agjencisë, periudhë që nis më 1 Prill dhe mbaron më 31 Mars të vitit të ardhshëm.
“Performanca e fortë në bujqësi, sheshimi i kurbës së infeksionit të Covid-19 dhe rritja e shpenzimeve qeveritare po mbështesin ekonominë”- deklaroi S&P. Në vitin 2020, India hyri në recesion teknik për shkak të goditjes nga pandemia, ndërkohë që vendi ka raportuar numrin e dytë më të madh të rasteve në 10.9 milionë.
Për vitin e plotë fiskal 2021, që përfundon më 31 Mars, India pritet të tkurret me 7.7%. Shpejtësia e rimëkëmbjes do ndikojë edhe tek vlerësimi i kreditit të vendit ,sipas agjencisë. Qeveria indiane është përqendruar në masa të shpenzimeve që janë projektuar për të rritur kërkesën dhe për të rimëkëmbur ekonominë, me deficitin fiskal që pritet në 6.8% të PBB.
Agjencia theksoi se perspektiva afat-shkurtër është gjithashtu pozitive, për shkak se rastet e reja të Covid-19 kanë nisur rënien, çka mundëson hapjen graduale të ekonomisë. Vendi nisi në muajin e kaluar fushatën më të madhe në botë të vaksinimit, që synon të injektojë rreth 300 milionë njerëz në fazën e parë.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.