India ka gënjyer botën! Ka manipuluar shifrat e rritjes ekonomike, e thotë një studim i Harvardit

India gjatë viteve të fundit, ndër ekonomitë e mëdha, ka qenë ajo me rritjen më të shpejtë në botë. Vazhdimisht, qeveria indiane është akuzuar për manipulim të shifrave.

Një studim i publikuar së fundmi ndërkohë, tregon me fakte se në çfarë shkallë arrin ky manipulim. Sipas studimit në fjalë, gjatë viteve 2011-2017, rritja e ekonomisë indiane nuk ka qenë në masën 7%, por në vetëm 4.5% mesatarisht. Studimi është kryer nga Universiteti i Harvardit. Mbivlerësimi i rritjes ekonomike ka filluar që të ndodhë pikërisht pas ndryshimit të metodologjisë së përllogaritjes së Prodhimit të Brendshëm Bruto në vitin 2012.

Ndryshimi i metodologjisë i bëri vlerësimet e PBB më të ndjeshme ndaj ndryshimit të çmimeve dhe për rrjedhojë manifaktura u mbivlerësuar ndjeshëm. Qeveria indiane ende nuk ka bërë asnjë koment në lidhje me zbulimin më të fundit të universitetit të Harvardit. Por, studimi në fjalë hedh hije të rënda dyshimi mbi statistikat indiane.

Më herët gjatë vitit, të dhënat për punësimin ngritën polemika të mëdha, me një pjesë të madhe ekonomistësh dhe studiuesish që vunë në pikëpyetje të dhënat. Shifrat e fundit flasin për ngadalësim të ekonomisë indiane pranë nivelit më të ulët në 5 vite, gjatë tremujorit të parë të vitit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.