India, mbi 6,000 vdekje nga Covid / Numri më i lartë ditor në botë deri më tani gjatë pandemisë
Vdekjet ditore në Indi nga koronavirusi arritën në një rekord të lartë ditën e Enjte, në mbi 6,000 persona, duke kaluar rekordin e vdekjeve ditore të Shteteve të Bashkuara. Ministria e Shëndetësisë tregoi se 6,148 vdekje të lidhura me Covid janë regjistruar në 24 orët e fundit, ndërkohë që rastet ditore qëndruan poshtë 100,000 për të tretën ditë radhazi. Vdekjet u rritën pasi një nga shtetet më të varfëra të Indisë, Bihar, rishikoi numrin total të vdekjeve nga 5,400 në mbi 9,000, duke llogaritur edhe njerëzit që kanë ndërruar jetë në shtëpi apo spitalet private. India po lufton me një valë vdekjeprurëse të koronavirusit që nisi në muajin Shkurt dhe është përshpejtuar në Prill dhe fillim të Majit, duke mbingarkuar sistemin e kujdesit shëndetësor në vend. Spitalet kanë hasur vështirësi, me mungesë të shtretërve, oksigjenit dhe barnave, ndërkohë që shumë mjekë dhe infermierë ndërruan jetë nga sëmundja. Ndërkohë që rastet arritën kulmin në muajin Maj, autoritetet kanë nisur të shqetësohen mbi një valë të tretë të mundshme, që pritet të godasë më vonë gjatë vitit. Ekspertët thonë se shpejtimi i vaksinimit është mënyra e vetme e Indisë që të rimëkëmb ekonominë dhe të zbusë efektet e një vale të tretë. Megjithatë, programi i imunizimit, që nisi në Janar, është përballur me probleme, përfshirë me mungesë të vaksinave, çka ka mundësuar vaksinimin e më pak se 5% e popullsisë deri më tani.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.