Industria e çelikut në Europë – Krijohet lojtari i dytë më i madh, “Thyssenkrupp-Tata Steel”

Prodhuesi gjerman i çelikut dhe një nga firmat më të mëdha në botë të këtij sektori, Thyssenkrupp, arriti një marrëveshje me homologun indian, “Tata Steel”,  për të shkrirë operacionet në Europë, duke krijuar një sipërmarrje të përbashkët dhe prodhuesin e dytë më të madh të çelikut në kontinent pas “ArcelorMittal”.

Sipas firmës indiane, marrëveshja nuk do të përfshijë para’ cash,  pasi të dy kompanitë do të kontribuojnë me borxh dhe detyrime,  për të arritur një zotërim të barabartë të aksioneve dhe të qëndrojnë investitorë afat-gjatë.

Kompanitë raportuan se konsolidimi është i nevojshëm, për të trajtuar mbikapacitetin në tregun europian të çelikut, që përballet me produktet e lira të importit nga Kina dhe kërkesë të ngadaltë për ndërtim. Aksionet e kompanisë gjermane u rritën me rreth 5% në sesionin tregtar europian, ndërsa firma indiane u rrit me 0.7% në vlerë tregu.

“Nën bashkëpunimin e planifikuar, ne po i japin aktivitetit Europë të Thyssenkrupp dhe Tata Steel, një të ardhme të sigurt”, tha kreu i kompanisë gjermane, Heinrixh Hiesinger, duke shtuar se po përpiqen të trajtojnë sfidat strukturore në industrinë europiane të çelikut dhe të krijojnë lojtarin e dytë më të madh në treg.

Kompania e re, që do të quhet, “Thyssenkrupp Tata Steel”, do të ketë selinë në Amsterdam, deklaruan kompanitë pas nënshkrimit të memorandumit të mirëkuptimit (MoU), lajm që u mirëprit edhe nga Kryeministri i Holandës, Mark Rutte.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.