Industria gjermane, në vështirësi. Prodhimi rritet më pak se ç’pritej, recesion i dyfishtë prej pandemisë
Industria gjermane është rritur më pak se sa pritej në Shtator, ndërkohë që kriza e koronavirusit ka frenuar aktivitetin, ç’ka tregon se ekonomia më e madhe në Europë mund të mos ketë fuqi mjaftueshëm për të shmangur një recesion të dyfishtë. Prodhimi industrial u rrit me 1.6% gjatë muajit, sipas Zyrës Federale të Statistikave, poshë pritshmërive për 2.7%. Kjo u nxit kryesisht nga sektori i makinave, më i madhi në Gjermani, që pati një rritje me 10% në Shtator.
Ministria e Ekonomisë deklaroi se sektori i manifakturës po lufton gradualisht. Sipas ministrisë, porositë e reja për “Made in Germany” dhe klima e biznesit tregojnë për një vazhdim të procesit të rimëkëmbjes, pavarësisht se rrugëtimi është i vështirë prej pandemisë. EKonomia u rrit me një normë rekord prej 8.2% në tremujorin e tretë, prej shpenzimeve më të mëdha konsumatore dhe eksporteve. Megjithatë, vala e dytë agresive e koronavirusit dhe masat e reja të karantinës, po zbehin tashmë perspektivën për tremujorin e katërt.
Një sondazh i publikuar gjatë javës tregoi se aktiviteti i shërbimeve u tkurr për të parën herë në 4 muaj gjatë Tetorit, ç’ka sinjalizon se ekonomia po haste vështirësi që përpara karantinës së dytë. Ekonomistët presin që industria t’i japë vrull ekonomisë në tremujorin e katërt, por karantina e dytë dhe kërkesa e dobët nga vendet e Eurozonës, mund të shkaktojë një recesion të dyfishtë për Gjermaninë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.