Industria gjermane – Prodhimi bie më pak nga sa pritej, tregtia mbetet e fortë
Prodhimi industrial në Gjermani ra më pak se sa pritej për muajin Mars dhe tregtia ka mbetur e qëndrueshme, duke mbështetur një rritje të fortë për tremujorin.
Të dhënat vijnë pas publikimit të porosive industriale ditën e djeshme, që u rritën për të dytin muaj radhazi në Mars. Rritja ekonomike e Gjermanisë, që do të publikohet ditën e Premte, pritet tashmë në 0.6% për tremujorin e parë, nga 0.4% që ishte në tremujorin e fundit 2016.
Prodhimi industrial ra me 0.4% për muajin, tregojnë të dhënat e Ministrisë së Ekonomisë. Analistët prisnin një rënie me 0.6%. Kjo erdhi prej rënies së prodhimit të energjisë me 2.5%. Prodhimi në fabrika ra me 0.5% ndërsa në ndërtim, u rrit me 1.5%. Për të gjithë tremujorin e parë, prodhimi industrial u rrit me 1.4%.
Ministria bën të ditur se prodhimi do të vazhdojë në një trend pozitiv duke marrë parasysh porositë dhe humorin e bizneseve. Të dhëna të tjera nga Zyra Federale e Statistikave treguan se eksportet janë rritur me 0.4% për muajin, duke shënuar një rekord prej 105.4 miliardë euro.
Importet u rritën me 2.4%, gjithashtu në nivel rekord me 85.8 miliardë euro. Kjo e la vendin me një suficit tregtar prej 19.6 miliardë euro, nga 21.2 miliardë që ishte në Shkurt.
Analistët thonë se Gjermania po përfiton nga rimëkëmbja e ekonomisë globale dhe se zotëron produkte që janë në kërkesë në të gjithë botën.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.