Industria, shenja rimëkëmbje në fund të 2020-ës – Rritet industria përpunuese, ende në krizë ajo nxjerrëse
Fundi i vitit të kaluar ka sjellë një përmirësim të disa prej treguesve kryesorë të mbarëvajtjes ekonomike të vendit pas një viti mjaft të vështirë. Kështu, shifrat zyrtare nga Instituti i Statistikave tregojnë se, më në fund, industria ka dalë nga dhënë shenja rimëkëmbje në tremujorin e fundit të vitit 2020. Gjatë kësaj periudhe kohore, indeksi i shitjeve neto në volum në industri është regjistruar në një rritje prej 0.1% krahasuar me të njëjtën periudhë të një viti më parë. Indeksi i prodhimit në sektor ndërkohë, shënon një rënie prej 1.8% në terma vjetorë gjatë së njëjtës periudhë kohore. Edhe sa i përket punësimit, shifrat janë negative, me indeksin e numrit të të punësuarve në rënie me 9.3% dhe atë të fondit të pagave në -1.8%, tregojnë shifrat zyrtare.
Tendenca rritëse vjen kryesisht nga zgjerimi i ndjeshëm i industrisë përpunuese. Shifra negative ndërkohë vijnë për një segment të industrisë, atë nxjerrëse, që vijon të jetë e “zhytur” në krizë të thellë. Shitjet dhe prodhimi në industrinë nxjerrëse regjistrohen në rënie prej rreth 25% gjatë tremujorit të fundit të vitit të kaluar, ndërkohë që indeksi i numrit të të punësuarve dhe fondi i pagave regjistrohen në rënie me rreth 17% dhe 12% respektivisht.
Sa i përket ndërtimit ndërkohë, tremujori i katërt i vitit të kaluar ka regjistruar një rritje të ndjeshme, prej më shumë se 20% në shitjet dhe prodhim, në terma vjetorë, dhe rritje nën 5% sa i përket indeksit të fondit të pagave dhe atë të numrit të të punësuarve.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.