Inflacioni bie sërish – Arrin në 1.7% për muajin shkurt
Inflacioni ra më tej në muajin shkurt. Sipas Instat, ndryshimi vjetor i indeksit të çmimeve të konsumit ishte 1.7%, në rënie nga niveli 1.9% i janarit. Rënia erdhi kryesisht si rezultat i zbutjes së inflacionit për grupin e ushqimeve. Çmimet e këtij grupi u rritën 3.8% në shkurt, ndërsa në janar rritja kishte qenë 4.3%. Brenda grupit të ushqimeve, shtrenjtimin më të lartë edhe për shkurtin e regjistroi grupi i perimeve, me 26.4%. Ndërkohë, tendencë të kundërt shfaqën frutat, ku çmimet ranë 5% krahasuar me një vit më parë.
Çmimet ranë edhe për grupin bukë dhe drithra me 1,1 %. Grupet e tjera regjistruan luhatje të vogla dhe ndikimi i tyre në ndryshimin e inflacionit për shkurtin ishte pothuajse i papërfillshëm. Banka e Shqipërisë parashikon që mbiçmimit i lekut do të vazhdojë të japë efekte në çmime edhe në gjysmën e parë të këtij viti. Ky efekt u vërejt edhe në rënien e ndjeshme të çmimeve të prodhimit për tremujorin e fundit të vitit të kaluar.
Megjithatë, ky efekt pritet të shuhet në periudhën në gjysmën e dytë të vitit dhe Banka e Shqipërisë vlerëson se presionet e brendshme inflacioniste janë drejt forcimit. Inflacioni pritet të kthehet në objektiv në gjysmën e dytë të vitit 2020. Ulja e papunësisë dhe rritja e shfrytëzimit të kapaciteteve prodhuese pritet të sjellë gradualisht një rritje më të lartë të çmimeve.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.