Inflacioni gjerman përshpejtohet me ritmin më të shpejtë që nga 2012

Inflacioni gjerman u përshpejtua me ritmin më të shpejtë që nga shkurti i vitit 2012, madje edhe pasi rritja ekonomike pati një lloj ndalese të përkohshme, duke paraqitur sinjale të përziera për Bankën Qendrore Europiane.

Çmimet e konsumit u rritën me 2.4 për qind në muajin tetor, krahasuar me 2.2 për qind në shtator dhe përputhen me vlerësimin mesatar në një anketë të Bloomberg.

Ndërtimi i presioneve të çmimeve në ekonominë më të madhe të Europës ndihmon në arsyetimin e planit të BQE-së për të mbuluar programin e blerjes së obligacioneve në dhjetor, por vjen edhe në kuadrin e ngadalësimit të momentit ekonomik në vend dhe në të gjithë rajonin. Prodhimi në Eurozonë u zgjerua vetëm 0.2 për qind në tremujorin e tretë, më i dobëti në katër vjet, me rritje në Itali dhe zgjerimin e Francës më dobët nga parashikimi.

Deri më tani zyrtarët e bankës qendrore kanë mbetur  ‘gjakftohtë’. Bundesbank tha sipas Bloomberg se pret zero rritje gjermane për tremujorin e tretë, kjo për shkak të faktorëve të përkohshëm. Presidenti i BQE, Mario Draghi tha se ndërsa eurozona ka humbur vrullin, nuk ka rënie dhe kërkesa e brendshme mbetet e qëndrueshme. Këshilli Drejtues do të mbajë një takim politik më 13 dhjetor për të shqyrtuar vendimin për të ndaluar blerjet e aseteve në fund të vitit. Gjithnjë është thënë se vendimi varet nga të dhënat hyrëse.

Sipas një matjeje kombëtare, inflacioni në Gjermani qëndroi në 2.5 për qind në tetor, niveli më i lartë që nga viti 2008.

e.t/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.