Inflacioni godet konsumatorin në SHBA – Rriten çmimet e ushqimeve, qirave dhe një varg të produkteve
Indeksi i çmimit të konsumit është rritur në Shtator, ndërkohë që amerikanët kanë paguar më shumë për ushqim, qira dhe një varg të produkteve, duke shtuar presionet tek administrata e Biden për të zgjidhur me urgjencë problemet e zinxhirit të ofertës. Me çmimet që ka gjasa të rriten në muajt e ardhshëm, duke ndjekur rritjen e kostove të energjisë, raporti i Departamentit të Punës mund të sfidojë deklaratën e guvernatorit Jerome Powell, se inflacioni i lartë është i përkohshëm.
Powell dhe Shtëpia e Bardhë e kanë fajësuar rritjen e çmimit tek ngërçi në ofertë. Zinxhirët e furnizimit janë bllokuar nga kërkesa e fortë, ndërkohë që ekonomitë po dalin nga pandemia. Koronavirusi ka shkaktuar një mungesë botërore të punonjësve që duhen për të prodhuar lëndë të para dhe transportuar mallrat nga fabrikat tek konsumatorët. Presidenti Joe Biden lajmëroi këtë javë se porti i Los Angeles do nisë të operojë me kohë të plotë, duke ndjekur portin në Long Beach, për të zbutur ngërçin. Shitës me pakicë si Walmart si dhe kompani të dërgesave si Fedex dhe UPS, ranë gjithashtu dakord se do lëvizin mallra 24 orë në ditë, 7 ditë në javë.
Indeksi i çmimit të konsumit u rrit me 0.4% në muajin e kaluar, pasi shtoi 0.3% në Gusht. Çmimi i ushqimeve u rrit me 0.9%, që është rritja më e madhe e ushqimeve që prej Prillit 2020, kryesisht prej rritjes së kostos së mishit. Qiraja ekuivalente e pronarëve të banesës primare, që është ajo që do merrnin pronarët nga dhënia me qira e një shtëpie, u rrit me 0.4%. Kjo ishte rritja më e madhe në 5 vite dhe ndjek një rritje me 0.3% në Gusht. Qiratë po rritën ndërkohë që kërkesa për strehim është rimëkëmbur në qytete, pasi pandemia shkaktoi një dalje drejt rretheve, me më pak banorë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.