Inflacioni i harmonizuar, në 2.1% – INSTAT: Qira, energji, transport, veshje e ushqim u rriten nga 2.2%-3.7%
Rriten përsëri çmimet për mallrat e konsumit në vendin tonë. Sipas të dhënave të INSTAT ndryshimi vjetor i matur nga Indeksi i Harmonizuar i Çmimeve të Konsumit në muajin Qershor të këtij viti është 2,1%. Një muaj më parë, pra në maj, ky tregues ishte në 1.8%.
“Argëtim dhe kulturë” është grupi që ka pësuar dhe rritjen më ta madhe të çmimeve prej 3,7 %. Më pas vijnë grupet “Ushqime dhe pije joalkoolike” me 3,4%, “Veshje dhe këpucë” me 3%, “Transporti” me 2,6 %, “Qira, ujë, lëndë djegëse dhe energji” 2,2 %, “Pije alkoolike dhe duhan” me 1,0 %, “Shërbimi arsimor” me 0,9%, “Mobilim, pajisje shtëpie dhe mirëmbajtje” me 0,5%, etj.
Sipas të dhënave të INSTAT në muajin Qershor 2018, ndryshimi mujor i matur nga Indeksi i Harmonizuar i Çmimeve të Konsumit është -0,1 % nga -1.4% që ishte në muajin maj. Ky ndryshim është ndikuar kryesisht nga ulja e çmimeve të grupeve “Shëndeti” dhe “Hotele, kafene dhe restorante” me 0,3 % secili, pasuar nga grupi “Ushqime dhe pije joalkoolike” me 0,2 % Ndërsa, çmimet e grupit “Veshje dhe këpucë” u rritën me 0,5 %, pasuar nga grupet “Pije alkoolike dhe duhan”, “Qira, ujë, lëndë djegëse dhe energji” dhe “Transporti” me 0,2 % secili.
Në grupet e tjera nuk pati ndryshime krahasuar me muajin e mëparshëm. Indeksi i harmonizuar i çmimeve të konsumit përfshin shpenzimet e bëra brenda territorit të vendit nga familjet shqiptare, si dhe shpenzimet e vizitorëve, ndryshe nga indeksi i çmimeve të konsumit, që mbulon vetëm shpenzimet private të familjeve shqiptare të kryera brenda dhe jashtë vendit.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.