Inflacioni, mbi pritshmëritë – Gjermani, në 1.5% gjatë muajit korrik, falë ushqimeve
Norma e inflacionit në Gjermani u regjistrua në nivele të pandryshuara gjatë muajit Korrik, tregojnë të dhënat e fundit. Leximi i normës së inflacionit rezulton mbi pritshmëritë e tregjeve dhe analistëve dhe merr shtysë kryesisht nga rritja e ndjeshme e çmimit të produkteve ushqimore.
Çmimet e konsumit në ekonominë më të madhe të Europës u rritën me 1.5% në terma vjetorë, tregojnë të dhënat. Po kaq, ishte norma e inflacionit në vend edhe gjatë muajit Qershor. Tregjet dhe analistët prisnin një normë inflacioni pranë 1.4%.
Në terma mujorë ndërkohë, çmimet u rritën me një normë prej 0.4%, ndërkohë që pritshmëritë flisnin për një normë rritje pranë 0.3%. Bashkë me çmimet e ushqimeve, në thuajse të gjitha kategoritë e tjera, çmimet kanë pësuar rritje, tregojnë të dhënat.
Paçka se larg objektivit të Bankës Qendrore Europiane, pranë dhe më poshtë se 2%, norma e inflacionit në Gjermani mbetet e kënaqshme, pasi lejon hapësira të nevojshme për konsumatorët.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.