Inflacioni në 1.4% – Rritet lehtë për prillin, por ngelet i ulët
Inflacioni u rrit lehtë për prillin, por ngelet në nivele të ulëta dhe ndjeshëm poshtë objektivit të Bankës së Shqipërisë.
Instat bën të ditur se inflacioni u rrit në 1.4%, nga 1.1% që kishte qenë për marsin. Megjithatë, ky tregues ngelet ndjeshëm më poshtë në raport me të njëjtën periudhë të vitit të kaluar, kur ishte në nivelin 2.1%. Rritja, sado modeste, e muajit prill erdhi kryesisht nga rritja e inflacionit për grupin e ushqimeve, që arriti në 2.7%, nga 2% që kishte qenë për marsin. Brenda grupit të ushqimeve, çmimet e nëngrupit “zarzavate ” u rritën me 14%, pasuar nga nëngrupet “qumësht, djathë dhe vezë” me 2,6 %, “peshk” me 2%, etj.
Nga ana tjetër çmimet e nëngrupit “vajra dhe yndyrna” u ulën me 0,6 % pasuar nga nëngrupet, “fruta” me 0,4%, “bukë dhe drithëra” me 0,1%. Grupet e tjera me peshë në indeksin e çmimeve të konsumit nuk pësuan luhatje domethënëse gjatë muajit prill, duke bërë që inflacioni të ngelet në nivele mjaft të ulëta. Banka e Shqipërisë kishte parashikuar që mbi çmimit i lekut do të vazhdonte të jepte efekte në uljen e çmimeve edhe në gjysmën e parë të këtij viti.
Megjithatë, nivelet aktuale janë ndoshta edhe më të ulëta se pritshmëritë e lidhura me efektin e kursit të këmbimit. Në muajt e fundit, Banka e Shqipërisë është shprehur se rreziqet për një rritje më të ngadaltë ekonomike po shtohen, çka mund të bëjë që edhe inflacioni të qëndrojë i ulët. Rreziqet për ekonominë lidhen si me zhvillimet në ekonominë e eurozonës, ashtu edhe me faktorë të brendshëm, përfshi këtu krizën politike. Sidoqoftë, Banka e Shqipërisë pret një kthim të inflacionit pranë objektivit prej 3% mes fundit të vitit 2020 dhe fillimit të vitit 2021.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.