Inflacioni në Europë, në nivelin e 2008 – Rajoni goditet nga rritja e çmimit të energjisë që pritet të zgjasë
Inflacioni në Eurozonë shënoi nivelin më të lartë në 13 vite në Shtator, ndërkohë që rajoni po përballet me rritjen e kostove të energjisë. Inflacioni rezultoi në 3.4% në Shtator, sipas të dhënave nga zyra e Statistikave e bashkimit Europian. Ky është niveli më i lartë që prej Shtatorit 2008, kur inflacioni arriti në 3.6% dhe vjen pasi çmimet e konsumit në Gjermani u rritën në 4.1%, që është niveli më i lartë në 30 vite. Rritja është nxitur nga çmimet e energjisë, duke shtuar shqetësimet tek politikëbërësit. Çmimi i kontratës mujore të gazit hollandez (TTF), që merret si referencë në Europë, është rritur me 400% që prej nisjes së vitit.
Për më tepër, kjo rritje rekord e çmimeve të energjisë, nuk pritet të përfundojë së shpejti , me analistët që paralajmërojnë shqetësime në treg, që do vazhdojnë përgjatë Dimrit. Franca është bërë vendi i fundit që shton masat për të zbutur kostot e konsumatorëve. Kryeministri Jean Castex bëri të ditur se qeveria do bllokojë rritje të mëtejshme të çmimit të gazit si dhe rritjen e tarifave të energjisë elektrike.
Megjithatë më përpara se këto masa të japin efekt, çmimi i gazit do rritet me 12.6% për konsumatorët francezë. Italia, Spanja dhe Greqia kanë marrë gjithashtu masa për të trajtuar rritjen e çmimeve. Bankierët qendrorë thonë se rritja e fundit e inflacionit është tranzitore dhe se do nisë ngadalësimi në vitin e ardhshëm. Megjithatë, presidentja e Bankës Qendrore Europiane, Christine Lagarder, tha se presionet tek çmimi i energjisë pritet të zgjasin përtej faktorëve të tjerë inflacionarë, si ndërprerjet në zinxhirët e furnizimit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.