Inflacioni në Eurozonë ngjitet në 1.1%, në Gjermani rritet me 1% në një muaj
Norma e inflacionit në Eurozonë është ngjitur në 1.1% gjatë muajit Dhjetor, nga 0.6% që regjistrohej në muajin Nëntor të vitit të kaluar.
Të dhënat i japin të drejtë kështu Bankës Qendrore Europiane dhe lehtësimit sasior në shkallë të gjerë. Ky lajm, vjen në serinë e atyre që tregojnë se rajoni i monedhës së përbashkët e ka mbyllur vitin në mënyrën më të mirë të mundshme, duke e nisur vitin 2017 me këmbën e mbarë.
Të dhënat janë zyrtare dhe janë publikuar nga Eurostat. Zyra e statistikave e Bashkimit Europian bën me dije gjithashtu se në rajonin me 28 vende, norma e inflacionit gjatë muajit të fundit të vitit u ngjit në 1.2%, nga 0.6% që ishte në muajin Nëntor të vitit të kaluar.
Të vetmet vende europiane në deflacion gjatë Dhjetorit rezultojnë Bullgaria dhe Rumania. Nga ana tjetër, norma më e lartë regjistrohet në Estoni, Beligjikë, Çeki dhe Letoni, madje mbi objektivin e Bankës Qendrore Europiane, që është pranë dhe më poshtë se 2%.
Kontributin kryesor në rritjen e normës së inflacionit e jep grupi i karburanteve. Gjermania ndërkohë është vendi që ka nxitur trendin, pasi norma e inflacionit është rritur me 1% në terma mujorë, nga 0.7, në 1.7%.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.