Inflacioni në Eurozonë ngjitet në 7.5% – Regjistron muajin e gjashtë me radhë në rritje gjatë prillit
Inflacioni në Eurozonë ka regjistruar një nivel rekord, duke u rritur për të gjashtin muaj me radhë. Për rrjedhojë është rritur presioni ndaj Bankës Qendrore Europiane për të reaguar, duke rritur normat e interesit. Inflacioni në 19 vendet që përdorin monedhën europiane u rrit në 7.5% për prillin, nga 7.4% që ishte në mars.
Zëvendës presidenti i BQE, Luis de Guindos u përpoq të qetësojë politikëbërësit, duke thënë se inflacioni mund të ketë arritur majën dhe do të fillojë tendenca në rënie.
Banka Qendrore vlerëson se presioni i çmimeve do të zbehet në gjysmën e dytë të vitit, pavarësisht se kostot e energjisë do ta mbajnë inflacionin në nivele relativisht të larta. Të dhënat e fundit mbi inflacionin vijnë paralelisht me shqetësimet se lufta në Ukrainë mund të dëmtojë edhe furnizimin me energji të rajonit dhe për rrjedhojë edhe rritjen ekonomike.
Rritja e çmimeve të energjisë kontribuoi në pjesën më të madhe në inflacionin gjatë muajit prill, pasi rezultuan 38% më të larta, krahasuar me prillin e vitit të kaluar. Më herët gjatë javës, kompania shtetërore ruse e gazit, Gazprom njoftoi ndërprerjen e furnizimit për Poloninë dhe Bullgarinë. Kjo lëvizje riktheu shqetësimet mbi sigurinë energjitike të kontinentit.
Rreth 40% të importeve të gazit Bashkimi Europian i merr nga Rusia dhe reduktimi i furnizimeve mund të rrisë më tej çmimet. Në këtë situatë, investitorët dhe analistët po presin me interes mënyrën se si do të veprojë Banka Qendrore Europiane për të parandaluar rritjen e çmimeve.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.