Inflacioni në korrigjim – Zbriti në 2.1% për muajin mars
Inflacioni zbriti lehtë për muajin mars në nivelin 2.1%, nga 2.2% që pati qenë gjatë shkurtit. Sipas të dhënave nga Instituti i Statistikave, inflacioni vjetor vazhdoi korrektimin nga rritja e muajit janar, kur ju afrua nivelit prej 3%. Ashtu siç pritej, rritja e janarit rezultoi e përkohshme, e lidhur sidomos me valën e pazakontë të ftohtit, që solli shtrenjtim të produkteve ushqimore.
Ndërsa gjatë shkurtit dhe marsit, inflacioni zbriti gradualisht drejt niveleve më pranë logjikës së performancës ekonomike. Sidoqoftë, inflacioni është ndjeshëm më i lartë krahasuar të njëjtën periudhë të një viti më parë, kur regjistronte nivelin 0.3%. Edhe vitin e kaluar nivelet shumë të ulëta u ndikuan gjithashtu nga faktorë të përkohshëm, por sidoqoftë, prirja e inflacionit është në një rritje graduale.
Në tre muajt e parë të këtij viti, inflacioni po qëndron sipër kufirit të poshtëm prej 2% të intervalit të objektivit të Bankës Qendrore. Kontributin kryesor në inflacion vazhdon ta japë grupi i ushqimeve, megjithatë, pesha e këtij grupi në inflacion po bie gradualisht.
Një kontribut të konsiderueshëm në inflacion për marsin dhanë grupet “Qira, ujë, lëndë djegëse, energji” dhe grupi “Transporti”. Ulja e përqendrimit të inflacionit te grupi i ushqimeve mund të jetë një sinjal se kërkesa e brendshme po përmirësohet. Banka e Shqipërisë parashikon që për vitin 2017 inflacioni të jetë pranë nivelit 2.4%, në rritje të ndjeshme nga niveli prej 1.3% i regjistruar në vitin e kaluar.
Kthimi i plotë i inflacionit pranë objektivit prej 3%, sipas Bankës Qendrore, pritet të ndodhë në gjysmën e parë të vitit të ardhshëm.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.