Inflacioni në vlera shqetësuese! Zbriti në 1.1% për dhjetorin, vlera më e ulët në 9 muaj
Inflacioni pësoi një rënie të mëtejshme gjatë dhjetorit, duke prekur nivelin 1.1%, më i ulëti për 9 muajt e fundit. Sipas të dhënave nga Instituti i Statistikave, inflacioni mesatar për gjithë vitin 2019 rezultoi 1.4%, në rënie të ndjeshme nga niveli 2% i vitit 2018. Analizat e Bankës së Shqipërisë fillimisht e shpjeguan rënien e inflacionit gjatë vitit të kaluar me faktorë kalimtarë të krahut të ofertës dhe sidomos me shtrirjen e efekteve të mbiçmimit të lekut në kursin e këmbimit valutor. Banka Qendrore priste një rritje të inflacionit në gjysmën e dytë të vitit, por, në fakt, kjo nuk ndodhi. Veç presioneve të dobëta inflacioniste nga jashtë, Banka e Shqipërisë pranoi se ende kërkesa e brendshme nuk ka arritur të gjenerojë një rritje të mjaftueshme të çmimeve. Banka e Shqipërisë pret që inflacioni të kthehet në objektiv në fund të vitit 2021 dhe, ndërkohë, nuk ka përjashtuar një ulje të mëtejshme të normës bazë të interesit.
Për muajin dhjetor, rënia e inflacioni u ndikua kryesisht nga grupi i ushqimeve, ku rritja vjetore e çmimeve zbriti në 2.6%, nga 3.2% që kishte qenë për nëntorin. Rënia e inflacionit të këtij grupi u ndikua sidomos nga nëngrupi i perimeve, që regjistroi një rritje të çmimeve me vetëm 1.2% krahasuar me një vit më parë.
Rënie të ndjeshme gjatë dhjetorit pësoi edhe inflacioni i grupit që përfshin pijet alkoolike dhe duhanin. Inflacioni këtyre mallrave iu afrua nivelit 0 për dhjetorin, çka mund të interpretohet si një ulje e kërkesës për produktet jo të domosdoshme. Besohet se tërmeti i nëntorit dha një lloj ndikimi në rënien e kërkesës dhe konsumit gjatë muajit dhjetor, përfshi sezonin e festave të fundvitit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.