Inflamacioni i zemrës nga Pfizer, Moderna / FDA e liston tek paralajmërimet për adoleshentët dhe të rinjtë
Administrata e Barnave dhe Ushqimeve në Shtetet e Bashkuara, bëri të ditur se planifikon të shtojë një paralajmërim mbi rastet e rralla të inflamacionit të zemrës tek adoleshentët dhe të rinjtë, tek të dhënat për vaksinat e Pfizer dhe Moderna. Qendrat për Kontrollin dhe Parandalimin e Sëmundjeve zbuluan se inflamacioni i zemrës tek adoleshentët dhe të rriturit e rijnë, ka gjasa të lidhet me vaksinat, por që përfitimi nga injeksioni e tejkalon bindshëm rrezikun. Aksionet e Moderna ranë me 4.2% dhe Pfizer me 1.4%. Rregullatorët e Shëndetësisë në shumë vende kanë hetuar nëse të dy vaksinat që përdorin teknologjinë e lajmëtarit të ARN, përbëjnë rrezik dhe nëse po, sa serioz është. Qendra për Kontrollin dhe Parandalimin e Sëmundjeve theksoi se pacientët me inflamacion të zemrës pas vaksinimit zakonisht shërohen nga simptomat dhe i’a dalin mirë. Departamenti i Shëndetësisë dhe Shërbimeve Njerëzore në SHBA, deklaroi se vaksinat janë të sigurta dhe efektive dhe se efektet anësore tek zemra janë jashtëzakonisht të rralla. Doktorët dhe spitalet janë paralajmëruar nga agjencitë shëndetësore që të shohin për simptoma të miokarditit apo perikarditit. Shqetësimet mbi variantin më të transmetueshëm Delta në Shtetet e Bashkuara kanë shtuar urgjencën e rritjes së vaksinimit, pavarësisht se përpjekjet për imunizimin janë ngadalësuar ndjeshëm. Numri i amerikanëve që marrin dozën e parë të vaksinës ka rënë me rreth 85% nga maja në muajin Prill dhe ka gjasa të sjellë dështimin e objektivit të presidentit Joe Biden për të ofruar të paktën 1 dozë tek 70% e të rriturve deri më 4 Korrik.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.