Informaliteti në turizëm, në vëmendjen e Këshillit të Investimeve – Gati anketa me bizneset
Këshilli i Investimeve, organi i krijuar për të lehtësuar dialogun mes qeverisë dhe sektorit privat, do të ketë në fokus të mbledhjes së tij të ardhshme informalitetin dhe konkurrueshmërinë në sektorin e turizmit.
Lufta ndaj informalitetit në këtë sektor ishte një nga prioritetet e administratës tatimore, ku shumë subjekte në zonat bregdetare iu nënshtruan kontrolleve për lëshimin e kuponave, regjistrimin e biznesit dhe të punonjësve.
Në këtë kuadër, Sekretariati pranë Këshillit të Investimeve është duke zhvilluar një analizë për të identifikuar dhe evidentuar shqetësimet kryesore të biznesit dhe të ofrojë rekomandime përkatëse për të adresuar problematika në lidhje me informalitetin në sektor.
Fokusi i Notës Teknike do të jetë kryesisht mbi aspektet më të rëndësishme të zinxhirit të turizmit, akomodim hoteleri dhe operatorë udhëtimesh.
Një anketë është lancuar nga Sekretariati në korrik 2018 dhe deri më sot kanë marrë pjesë mbi 130 kompani nga sektori i turizmit. Disa prej pyetjeve përfshijnë reduktimin e TVSH-së për strukturat akomoduese në 6%, ndikimin e këtij lehtësimi për biznesin, ndërsa u kërkon subjekteve të propozojnë problematika të tjera për t’u zgjidhur.
Mbledhja e radhës e Këshillit të Investimeve do të mbahet në fund të Shtatorit.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.