Infrastrukturë e re në Moglicë – Inaugurohet rruga zëvendësuese përgjatë rezervuarit
Ndërsa pritet që vitin e ardhshëm të përfundojë ndërtimi i Hidrocentralit të Moglicës, rrugët zëvendësuese përgjatë bregut verior të rezervuarit kanë përfunduar. Ministri i Infrastrukturës dhe Energjisë Damian Gjiknuri bashkë me zv.Presidentin Ekzekutiv të kompanisë Statkraft inauguruan rrugët e reja që do t’i vijnë në ndihmë zonës dhe turizmit, për shkak se infrastruktura e vjetër përmbytet nga liqenet e HEC-eve, Banjë dhe Moglicë.
“Kjo është rruga e fundit që është rruga zëvendësuese e Moglicës e cila do të jetë rrugë nacionale pasi zëvendëson rrugën që do të përmbytet nga mbushja e liqenit dhe fillimi i punimeve të hidrocentralit të Moglicës. Është një shembull shumë i mirë i bashkëpunimit të partneritetit publik-privat, me një nga kompanitë më të mira në Shqipëri që është Statkraft. Në negociata me qeverinë ata arritën të nënshkruajnë një marrëveshje për ndërtimin e rrugëve zëvendësuese në gjithë këtë zonë ku një pjesë të kontributit e ka dhënë drejtpërdrejtë edhe qeveria nëpërmjet Buxhetit të Shtetit”
“Është një kënaqësi e madhe që jemi këtu sot për inaugurimin e rrugëve zëvendësuese të cilat janë shumë afër investimit tonë për hidrocentralin. Ky investim në tërësi do të shërbejë për të ndryshuar gjithë panoramën e zonës. Është një projekt shumë i rëndësishëm energjetik. Ne e vlerësojmë vërtet bashkëpunimin shumë të mirë dhe për një kohë të gjatë me qeverinë shqiptare. Ky investim është më i madhi yni në një vend jashtë Norvegjisë dhe është shumë fantastike që shohim se po ecën shumë mirë.”
Kompania Statkraft është duke zbatuar në Shqipëri projektin hidroenergjetik të Kaskadës së Devollit me hidrocentralet e Banjës dhe Moglicës. Fillimisht u realizua rruga Banjë-Gramsh dhe Ura e Trashovicës, në total me gjatësi 15.5 kilometra ndërsa tanimë ka përfunduar edhe rruga M03 e bregut verior të rezervuarit të Moglicës me gjatësi 15 kilometra. Një pjesë e konsiderueshme e investimit për rrugët është mbuluar nga qeveria shqiptare.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.