ING, gjobë për pastrimin e parave – Banka holandeze do paguajë $900 mln, për kontrollet e dobëta

Banka holandeze ING do të paguajë një gjobë prej 775 milionë euro, prej akuzave se kontrollet financiare janë dobëta dhe mundësojnë pastrimin e parave nga klientët. Hetimi përfshin periudhën nga viti 2010 në 2016-ën. ING është banka e tretë në Europë që akuzohet për pastrimin e parave këtë vit, ndërkohë që banka daneze Dankse Bank, përballet me hetime që lidhen me dështimin e huadhënësit në Letoni, ABLV.

Prokurorët deklaruan se kanë nisur hetimin në vitin 2016, pasi zbuluan shkeljet e bankës. Ata zbuluan se ING ka shkelur ligjin holandez për parandalimin e pastrimit të parasë dhe terrorizmit financiar prej vitesh, duke mos verifikuar saktësisht përfituesit e llogarive të klientëve dhe duke mos identifikuar transaksionet e pazakonta me këto.

Hetimi vuri në dukje disa shembuj specifik ku llogaritë e ING ishin përdorur për motive kriminale. Ndër këto përfshiheshin ryshfetet e dhëna nga kompania e telekomunikacionit VEON, në Uzbekistan. Kjo e fundit u gjobit nga autoritetet në SHBA dhe Holandë me 835 milionë dollarë në vitin 2016. Aksionet e huadhënësit ranë me 2.2% në 11.43 euro në sesionin tregtar të Amsterdamit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.