Iniciativa “Një brez një Rrugë” Lagarde: Të shoqërohet me politikat e duhura
Shefja e Fondit Monetar Ndërkombëtar, Christine Lagarde, deklaroi se, iniciativa e Kinës, “Një Brez një Rrugë” duhet të mbështetet nga politika të shëndosha dhe kornizat ligjore. Komentet e Lagarde u bënë në një intervistë ekskluzive për Rrjetin Televiziv Global Kinez në Uashington, ku u pyet mbi pikëpamjet e saj mbi iniciativën “Një Brez Një Rrugë”.
Shefja e FMN-së u shpreh se, rritja do të jetë gjithëpërfshirëse për të gjitha vendet e përfshira në këtë iniciativë.
“Mendoj se vizioni është magjepsës, projekti është qartësisht i përqafuar nga të gjitha vendet e përfshira, pasi ka shumë vende që kanë pranuar ti bashkohen këtij projekti. Mendoj se është ende herët për të folur mbi efektet, por ky projekt duhet të shoqërohet patjetër me politika, me kuadre ligjore, dhe jo vetëm nga ambiciet për të investuar në vende të veçanta. Sipas mendimit tim, duhet të ekzistojë ambicia për të investuar edhe në ato vende që ofrojnë një rritje të qëndrueshme ekonomike”, tha Lagarde.
Sipas shefes së FMN-së, me politika të duhura, Kina mund ti ndihmojë shumë edhe vendet e tjera, për tu zhvilluar ekonomikisht.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.