Inspektim në doganën e Durrësit – Denaj: Qëllimi kryesor, shërbimi ndaj bizneseve dhe qytetarëve
Administrata Doganore Shqiptare ka thjeshtuar mjaft procedura dhe ka eliminuar barriera për sipërmarrjet shqiptare dhe ato kosovare. Kjo, si pasojë e reformave të ndërmarra vitet e fundit për thjeshtimin e procedurave të cilat kanë ndikuar në përmirësimin e klimës dhe rritjen e besueshmërisë së biznesit në vend.
Ministrja Anila Denaj, gjatë një inspektimi në Degën doganore të Durrësit, u shpreh se shërbimi ndaj biznesit dhe qytetarëve është qëllimi kryesor, por i rëndësishëm është dhe realizimi i objektivave tona në luftën ndaj informalitetit.
“Së bashku me drejtuesit mendoj se ne duhet të rishikojmë, nëse ka nevojë, në mënyrë periodike elementët e riskut, dhe për t’i dhënë peshën e rëndësishme aspektit lokal, pasi është e nevojshme të japim mesazhet e qarta dhe për subjektet, jo me nevojën për të rritur inspektimet për një subjekt, por për të qenë efektivë në inspektimin që bëjmë dhe të jemi realist në daljen e përfundimeve të këtyre inspektimeve” -tha Ministrja Denaj ndër të tjerash.
Ndërsa Drejtoresha e Përgjithshme e Doganave, Belinda Ikonomi, e cila e shoqëronte Ministren, u shpreh, se tashmë po synohet drejt eleminimit sa më shumë të kohës së qëndrimit dhe kontrolleve fizike të bizneseve në Doganë.
Sipas Ikonomit, kanali jeshil, bëhet fjalë për subjekte që janë të sigurta, ndërsa kanali blu do të thotë që janë subjekte për të cilat kërkohet të bëhen kontroll dokumentar, por më pas largohen. Pra nuk përbëjnë risk, është thjesht kontroll dokumentar lidhur me mënyrën e vlerësimit.
“Pra, ne bëjmë një kategori që quhet e sigurt nga pikëpamja doganore, ndërsa diferenca është kontrolli dokumentar. Objektivi ynë është që në kuadër të lehtësimit dhe të thjeshtimit të procedurave për biznesin të arrijmë të dyfishojmë përqindjen e kanalit blu dhe kanalit jeshil, pra nga 15 % të shkojë në 30 %, pasi kjo ndikon ndjeshëm në uljen dhe reduktimin e kohës për procesimin e deklaratave, dhe padyshim na fokuson më shumë aty ku duhet të jemi të fokusuar, në mënyrë që të bëjmë më pak kontrolle, dhe më shumë efektivitet” -tha Ikonomi.
Ministrja Denaj vizitoi gjithashtu edhe Zyrën e Doganës së Kosovës në Durrës, e cila tashmë prej dy muajsh është prezente në ndihmë të biznesit Kosovar në procesin e tranzitit, një funksion që ka lehtësuar mjaft sipërmarrjen. “Me hapjen e kësaj dege ne tashmë kemi bërë të prekshëm vullnetin politik të dy qeverive, çka sipërmarrja po e ndjen çdo ditë e më shumë” -tha Ministrja.
Dega Doganore e Durrësit aktualisht është më e madhja në vend nga ku kryhet hyrja më e madhe e mallrave të importit, jo vetëm drejt vendit tonë, por edhe për fqinjët si Kosova apo Maqedonia. Të ardhurat nga kjo degë doganore përbëjnë rreth 40 % të të ardhurave totale të administratës doganore.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.