Instagram lançon opsionin e ri – Tashmë mund të rishpërndani postimet e të tjerëve pa qenë të detyruar t’i përdorni ato si tuajat
Tashmë mund të ndani postimin e dikujt tjetër të Instagramit në “Storiet” tuaja. Ky opsion i fundit i aplikacionit i cili ka qenë duke u testuar për një periudhë tashmë është në funksion të përdoruesve dhe mund të përdoret nga të gjithë.
Qëllimi i këtij opsioni të ri është shpërndarja e një postimi të dikujt pa qenë të detyruar ta ripërdorin atë si të tyrin.
Për të ndarë një postim të Instagram në faqen tuaj, mjafton të klikoni mbi ikonën e aeroplanit të letrës, ashtu siç dërgoni një “Instadirect” por në vend që ta shpërndani thjesht me një mikun tuaj ju do të keni mundësinë e rishpërndarjes të këtij postimi në “Storiet” tuaja.
Pasi ta keni postuar në “Storie-n” tuaj do të shfaqet emri i përdoruesit të postimit origjinal, në mënyrë që të tjerët të mund të kthehen në postimin origjinal.
Por për sa i përket privatësisë, ka një kufizim për këto opsione të reja. Ju mund të rishpërndani vetëm ato postime të cilat janë të postuara nga një profil publik dhe gjithashtu mund të zgjidhni nëse dëshironi që të tjerët të kenë mundësi të rishpërndajnë postimet tuaja.
V.H/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.