Institucionet, 9 milionë dollarë shkelje – Urdhri: Auditët e brendshëm do të verifikojnë në terren arkëtimin e dëmit dhe rekomandimet

Ndërsa 129 njësitë e auditimit të brendshëm të administratës publike zbardhin çdo vit miliona dollarë shkelje e dëme financuara të kryera nga dikasteret, një Udhëzim i miratuar nga Këshilli i Ministrave detyron njësitë të ndjekin vit pas viti në çmasë janë zbatuar rekomandimet e lëna pas inspektimeve. Njësitë duhet të verifikojnë në terren nivelin e zbatimit të rekomandimeve, si dhe t’I pasqyrojnë ato në një regjistër, veçanërisht ato që kanë të bëjnë me arkëtimin e të ardhurave të munguara në buxhetin e shtetit.

Televizion Scan ka zbardhur përmbledhjen e raportit të audituesve të brendshëm të institucioneve publike për vitin 2019, të cilat kanë zbardhu një total shkeljesh financiare prej afërisht 9 milionë dollarë.

Si rezultat i auditimeve të ushtruara gjatë vitit 2019 janë identifikuar shkelje të disiplinës financiare të cilat kanë shkaktuar efekt financiar negativ në Buxhetin e Shtetit prej 908 milion Lekë në sisteme të ndryshme si: prokurimi publik, paga dhe shpërblime, tatime dhe taksa, koncesione dhe administrimin e pronës shtetërore.

Dëmi më i madh është konstatuar nga audituesit e brendshëm në fushat Tatime, taksa dhe dogana 260 milionë lekësh, afërsisht 2.6 milionë dollarë.  Në fushën e Prokurimeve, blerjeve dhe investimeve audituesit e brendshëm kanë zbardhur një dëm ekonomik prej 191 milionë lekësh, afërsisht 1. 9 milionë dollarë. I treti për nga pasha është dëmi i zbuluar në zërin Paga, shpërblime, trajtime, komisione, me vlerë afërisht 1 milionë dollar, ndërkohë që në listë nuk mund të mungonin koncensionet, ku auditët e brendshëm kanë konstatuar një dëm ekonomik prej afërisht 900 mijë dollarësh.

Aktualisht në administratë operojnë 122 njësi auditimi të brendshëm me 428 specialistë, të cilat kanë dhënë mbi 8 mijë rekomandime për t’u përmbushur në vitin 2020.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.