Institucionet financiare – Kreditë me probleme, më të ulëta se bankat

Raporti i kredive me probleme për institucionet financiare jo banka ishte 12% në fund të vitit të kaluar. Sipas të dhënave nga Banka e Shqipërisë, ky tregues ngeli i qëndrueshëm edhe për vitin e kaluar.

Raporti i kredive me probleme ishte pothuajse në të njëjtin nivel krahasuar me një vit më parë dhe ngelet më i ulët në raport me sistemin bankar. Ndryshe nga sistemi bankar, institucionet financiare jo banka kanë një ritëm më të lartë të rritjes së portofolit të kredisë. Sipas Bankës së Shqipërisë, portofoli i kredisë së këtyre institucioneve u rrit me 16% gjatë vitit të kaluar.

Rritja e kredisë së re ndihmon në mbajtjen nën kontroll të raportit të kredive me probleme, që historikisht për institucionet financiare jo banka ka qenë më i ulët. Kjo lidhet kryesisht me tipologjinë e produkteve. Institucionet financiare jo banka japin kredi mesatarisht më të vogla krahasuar me bankat, të adresuara kryesisht te individët dhe bizneset e vegjël dhe mikro. Kjo iu mundëson një shpërndarje më të mirë të rrezikut kreditor.

Të dhënat e Bankës së Shqipërisë tregojnë se për vitin e kaluar fitimi i institucioneve financiare jo banka arriti në rreth 1.16 miliardë lekë, në rënie të lehtë krahasuar me vitin 2016.

Ersuin Shehu/SCAN

Kredia “jashtë bankave” – Arriti në 17 miliardë lekë në fund të 2017

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.