Instituti i Vjenës zhvlerëson Shqipërinë – Ul lehtë projeksionet për rritjen ekonomike këtë vit dhe atë të ardhshëm

Instituti i Vjenës ka ulur lehtë projeksionet për rritjen ekonomike të vendit tonë gjatë këtij viti dhe atij të ardhshëm, ndërkohë që ka rritur lehtë projeksionet për 2021-shin. Kështu, për këtë vit, Instituti i Vjenës në projeksionet më të fundit për ekonomitë e Europës qendrore dhe juglindore, flet për një rritje ekonomike pranë 3.7%, ndërkohë që në raportin e kaluar, atë të Marsit, sinjalizonte një rritje prej 3.8%, e njëjta gjë vlen edhe për vitin e ardhshëm, me rritjen ekonomike që projektohet në 3.7%, nga 3.8% që ishte më parë.

Sa i përket 2021-shit ndërkohë, Instituti i Vjenës flet për një rritje në 3.5%, nga 3.4% që ishte më parë. Projeksionet e institutit nuk janë aspak në linjë me ato të Fondit Monetar Ndërkombëtar, si për këtë vit, ashtu edhe për dy vitet e ardhshme. Instituti i Vjenës për studime ekonomike projekton gjithashtu një rritje të inflacionit. Çmimet e konsumit pritet të rriten me një hap mbi 2%, por sërish larg objektivit të Bankës Qendrore, që është pranë 3%. Papunësia ndërkohë projektohet të zbresë gradualisht deri në vitin 2021, pranë nivelit të 11%. Sa i përket ekonomisë së 23 vendeve të marra në analizë, Instituti i Vjenës për studime ekonomike ndërkombëtare thotë se ecuria është e qëndrueshme.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.