Integrimi, a jemi pranë? Në prag të zgjedhjeve për Parlamentin Europian situata është më e mjegullt se kurrë më parë
Nga Roel Korkuti
Samiti i Berlinit duket se është mbyllur pa asgjë konkrete, si në drejtim të integrimit në union të vendeve të Ballkanit Perëndimor ashtu edhe në drejtim të një marrëveshje të mundshme mes Serbisë dhe Kosovës. Kjo e fundit ishte pikërisht fokusi kryesor i Samitit, por duket se bisedimet nuk prodhuan asgjë të re. Edhe për pjesën tjetër, pra mbi vendet e caktuara, apo edhe bashkëpunimin rajonal nuk pati asgjë të re.
Palët, siç vihet re edhe në draftin final, kanë rënë dakord që të intensifikojnë përpjekjet e tyre për të krijuar zonën ekonomike rajonale, si dhe angazhimin e tyre për të bashkëpunuar nën kornizën e të ashtuquajturit procesi i Berlinit.
Ndërlidhja, ekonomia, tregtia e lirë, bashkëpunimi në çështjet e sigurisë, shkëmbimi i të rinjve, si dhe pajtimi përbën shtyllat kryesore të këtij procesi, thuhet më tej në deklaratë. Pjesëmarrësit ranë gjithashtu dakord që të shtojnë përpjekjet për të luftuar radikalizimin dhe terrorizmin por edhe migrimin e paligjshëm. Stabiliteti i rajonit, demokracia, sundimi i ligjit, lufta ndaj korrupsionit janë gjithashtu ndër angazhimet e tjera të marra gjatë samitit.
Franca, asgjë premtuese
Menjëherë pas përfundimit të Samitit të Berlinit, qeveria franceze ka publikuar një strategji për Ballkanin Perëndimor. Strategjia vjen si një shenjë përkushtimi e Francës për integrimin dhe zhvillimin ekonomik e social, si dhe për forcimin e sundimit të ligjit në të 6 vendet e Ballkanit Perëndimor. Pjesë e strategjisë janë edhe disa masa konkrete. Një ndër to është intensifikimi i marrëdhënieve politike me rajonin.
Në kuadër të kësaj, Emmanuel Macron do të vizitojë Shqipërinë në Korrik ndërkohë që brenda vitit, Ministri i Punëve të Jashtme të Francës do të vizitojë Shqipërinë dhe Kosovën. Franca zotohet të forcojë bashkëpunimin dypalësh me vendet e rajonit në këto fusha: zhvillimi ekonomik dhe social me ndërhyrjen e Agjencisë Franceze për Zhvillim (AFD), siguria dhe drejtësia. Ndihma vjetore e siguruar nga qeveria franceze, fillimisht 100-150 milion euro, do të shërbejë si levë për financimin e donatorëve të tjerë.
Sa i përket sigurisë, lufta kundër trafikimit të paligjshëm të armëve të vogla dhe armëve të lehta, krijimi i njësive të përhershme të inteligjencës kriminale, lufta kundër terrorizmit dhe radikalizimit, janë piketat kryesore.
Bashkëpunimi i ri mbi krimin financiar dhe ekonomik, trafikimin e pronës kulturore dhe specieve të mbrojtura, janë ndër shtyllat kryesore mbi të cilat do të bazohet ndihma e qeverisë franceze në drejtim të drejtësisë ndaj 6 vendeve të Ballkanit Perëndimor.
Maqedonia, po, Shqipëria, jo?!
Financial Times i ka dedikuar një tjetër shkrim Ballkanit Perëndimor dhe gjasave për një zgjerim të mundshëm të Bashkimit Europian, ku thekson se, Merkel dhe Macron e bënë të qartë gjatë javës se Shqipëria dhe Maqedonia e Veriut duhet të bëjnë më shumë progres në axhendën e reformave. “Disa vende të Bashkimit Europianë dhe zyrtarë, mendojnë se takimi i kësaj jave në Berlin ishte një gabim.
Ata shqetësohen nga mesazhi negativ që mund t`i jetë përcjellë Shkupit zyrtar”,-shkruan Financial Times duke i`u referuar qartë marrëveshjes së guximshme me Greqinë për të ndryshuar emrin. Ndër të tjera, zyrtarë të lartë të Bashkimit Europian i druhen faktit se, një sprapsje e Brukselit mund të eleminojë nxitjen që liderët e Shqipërisë dhe Maqedonisë së Veriut kanë për të çuar reformat përpara, thuhet më tej.
Tërheqja e Brukselit, shton FT, mund të rrisë influencën ruse dhe kineze në rajon, ku pasiguritë politike janë në rritje të vazhdueshme. Prestigjiozja shkruan gjithashtu se, për disa, Maqedonia e Veriut mund të marrë dritën jeshile, edhe pa Shqipërinë. Në prag të zgjedhjeve për Parlamentin Europian situata është më e mjegullt se kurrë më parë, me Europën që është e ndarë në dy kampe. Edhe instituti i Vjenës për Studime Ekonomike ka bërë njëj analizë mbi zgjerimin e Bashkimit Europian, ku thotë se, gjasat për integrimin e rajonit janë të pakta. Pengesat janë të mëdha, ndërkohë që entuziazmi i Europës perëndimore për t`u zgjeruar drejt rajonit, nuk duket të jetë aq i madh, thotë Instituti i Vjenës.
As gjermanët e as francezët nuk na duan
Gjermania dhe Franca nuk na duan si pjesë e Bashkimit Europian, siç nuk na duan edhe disa vende të tjera të Bashkimit Europian. Një anketë e fundit e kryer mbi qytetarë të ndryshëm të 7 vendeve të Bashkimit Europian, mbi pëlqimin e tyre ndaj anëtarësimit të vendeve të Ballkanit Perëndimor, por edhe shteteve të tjera në union, e ilustron më së miri këtë. Së pari, vetëm 23% e europianëve të anketuar duan që ne të bëhemi pjesë e unionit, ndërkohë që, thuajse gjysma, 44%, nuk na duan në BE.
Norma e pëlqimit është padiskutim më e ulta krahasuar me fqinjët tanë të Ballkanit Perëndimor. Pra, mes vendeve kandidate, ne, si shqiptarë, pasi Kosova është e dyta më pak e preferuar, jemi më pak të pëlqyerit për t`iu bashkuar familjes europiane. Vendet e anketuara janë: Gjermania, Franca, Suedia, Norvegjia, Finlanda, Danimarka dhe Britania e Madhe. Anketa është kryer në muajin Dhjetor të vitit të kaluar, kështu që edhe qëndrimet duket të jenë disi të freskëta. Vendi që na do më pak është Franca.
Vetëm 13% e francezëve na pranon në BE. Për ironi të fatit, në vend të dytë ndjek Gjermania, me 21% të qytetarëve të saj që na do në union. Në të dyja rastet, si për francezët, ashtu edhe për gjermanët, më shumë se gjysma e qytetarëve, e ka të qartë; nuk na duan në Bashkimin Europian. I vetmi vend tjetër i Ballkanit perëndimor ku kjo normë është mbi 50%, është pikërisht Kosova.
Pra, pikërisht Gjermania dhe Franca, vendet nismëtare të Samitit të Berlinit dhe procesit të integrimit të Ballkanit në Bashkimin Europian, duket të jenë ato më skeptiket, dhe me një qëndrim për të cilin do të duhet shumë punë për ta ndryshuar.
Suedezët dhe Norvegjezët janë ata që na duan më shumë mes vendeve të anketuara, me 31% dhe 32% të qytetarëve respektivisht, që duan të na shohin në union. Anketa është kryer nga “Yougov”, një kompani ndërkombëtare me qendër në Londër, për kërkime në treg, anketa si dhe kërkime analitike.
SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.