Integrimi i azilkërkuesve – Gus Albania, seminar 5-ditor me partnerët ndërkombëtarë
Aktiviteti i fundit i organizuar nga Gus Albania ka në fokus domosdoshmërinë e ndarjes së praktikave të mira për pritjen dhe integrimin e refugjateve dhe azilkërkuesve. Në seminarin 5-ditor marrin pjesë edhe partnerët ndërkombëtarë nga Turqia, Italia dhe Greqia.
Ky aktivitet organizohet nga data 23-27 Tetor dhe përbën fazën e tretë të projektit Erasmus+ 2016. Partnerët e këtij projekti përmes workshopeve, focus grupeve dhe aktiviteteve të tjera interaktive, shkëmbejnë së bashku praktikat më të mira të 4 shteteve në pritjen e azilkërkuesve dhe refugjatëve.
“Do të jenë disa hapa që do të ndërmerren, ku do të shihen jo vetëm politikat integruese, por do të shihen edhe se si funksionon kuadri ligjor, se si në Shqipëri institucionet dhe organizmat, qofshin ato qeveritare ose joqeveritare, i vijnë në ndihmë refugjatëve dhe emigrantëve dhe se si trajtohet çështja në vendin tonë. Një hap tjetër do të jetë edhe një reflektim për sa i përket politikave, ose çfarë janë gjërat që nuk shkojnë në ndihmën që u jepet refugjatëve dhe emigrantëve, çfarë janë gjërat që ndoshta duhet të përmirësohen dhe çfarë janë ato gjëra që me të vërtetë kanë rezultate goxha efektive”, shpjegon Derand Krasniqi, koordinator i aktivitetit.
Aktiviteti organizohet në bashkëpunim me Kolegjin Universitar “Wisdom”.
“Kolegji Universitar “Wisdom” mirëpret dhe është një nga partnerët aktivë në realizimin dhe finalizimin me sukses të këtij projekti. Pjesëmarrja jonë është sigurisht shumë më e gjerë se sa thjesht në hospitalizim, por edhe me trajnimet me të cilat do të zhvillohen në ambientet tona, por sigurisht edhe me pjesëmarrjen edhe të stafit akademik të Kolegjit Universitar ‘Wisdom”. Kemi dashur të japim kontributin tonë në krijimin e imazhit për sa i përket pjesës së emigracionit, krijimit të imazhit që ne jemi jo vetëm e kërkojmë pjesën e emigracionit, por sigurisht edhe jemi hospitalizues shumë të mirë të të gjithë personave që kanë kërkuar strehim në vendin tonë”, u shpreh Edit Bregu, zv.dekane e fakultetit të drejtësisë pranë këtij kolegji.
Enxhi Biba/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.