Integrimi nuk do të jetë i shpejtë – Macron: Fillimisht duhet të reformojmë BE, më pas zgjerimi
Samiti i Sofjes midis Bashkimit Europian dhe Ballkanit Perëndimor përfundoi me skepticizëm, përsa i përket zgjerimit të shpejtë të unionit. Presidenti i Francës, Emmanuel Macron, në konferencën për mediat të mbajtur menjëherë pas përfundimit të samitit, deklaroi se, e ardhmja e Ballkanit Perëndimor është në Bashkimin Europian, por fillimisht nevojitet një reformim i unionit.
“E ardhmja e vendeve të Ballkanit është padyshim në Bashkimin Europian, por duket kujdes dhe rigorozitet. Fillimisht duhet një reformim i thellë i unionit, në mënyrë që të kemi një funksionim më të mirë. Më pas mund të vijojmë me zgjerimin. Vendet e Ballkanit kanë bërë një punë mjaft të mirë me reformat, por nevojitet akoma më shumë punë në luftën kundër korrupsionit, shtetin e së drejtës dhe emigracionin. Ne do të vijojmë të mbështesim këto vende”, u shpreh Macron.
Më herët, në një konferencë të përbashkët për mediat, kryeministri i Bullgarisë, Bojko Borisov, presidenti i Këshillit Europian, Donald Tusk, dhe presidenti i Komisionit Europian, Jean-Claude Juncker, gjithashtu shprehën besimin se, e ardhmja e Ballkanit Perëndimor është vetëm më Bashkimin Europian.
“Për Ballkanin Perëndimor nuk ka Plan B, e ardhmja shihet në Bashkimin Europian. Ky samit ishte i frytshëm. Ajo që ne kemi thënë dhe i qëndrojmë është që integrimi i Ballkanit Perëndimor në BE mbetet në prioritetet tona. Folëm për konektivitetin në rajon dhe këtu nuk fokusohemi vetëm tek infrastruktura por edhe tek ekonomia apo kapitali njerëzor. Perspektiva është e qartë, por nuk duam të nxisim pritshmëritë më shumë sesa duhet, pasi nuk do të jetë një proces i shpejtë”, tha Tusk.
Liderët e Bashkimit Europian i bënë thirrje vendeve të Ballkanit të vijojnë me reformat. Presidenti Komisionit Europian, Jean-Claude Juncker, tha se fondet do të vijojnë për këtë rajon, për të përmirësuar infrastrukturën, dixhitalizimin, energjinë e rinovueshme dhe edukimin.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.